حدادكم دوت كوم: شد ولادك

خلى بالك وشد ولادك

"إبنى عصبى جداً"

"إبنى بيتهته فى الكلام"

"إبنى دمعته قريبة وبيعيط على أى حاجة"

كلها عبارات بنسمعها وبتتكرر فى كتير من بيوتنا والبيوت دى هى غالباً اللى برضة بنسمع فيها شكاوى من نوعية "ابنى متعلق بالكرتون بشكل غير عادى"، "ابنى طول النهار لازق عينه يا إما فى التلفزيون يا إما التاب او الموبايل".
مش كتير مننا قدر يربط ما بين الأعراض اللى اتذكرت فى الأول زى (العصبية - البكاء السريع و التهتهة) بالإضافة لحاجات تانية كتير زى (عدم المشاركة - الكسل - عدم التركيز وطبعاً الأنانية) وما بين السبب فى ده وهو بأختصار قضائهم وقت طويييل جداً مع التلفزيون والكرتون والألعاب اللى ع الموبايل والتاب وخلافه، واللى نقدر نسميها كدة (الأنغماس فى العالم التيكنولوجى) واللى لو كنا عايزين نبقى صريحيين مع نفسنا هنقول إن السبب فى دا كله كلمة واحدة يا ريت تخلوا بالكوا منها جداً السبب هو ((إحنا)) .. وعلى رأى عمر دياب "نقولها تااااانى" السبب فى الحالة العامة دى (إحناااااااااا) بعلو الصوت أهوه.

ببساطة كدة إحنا اللى عاملين فى ولادنا كدة .. إحنا اللى هربنا منهم ومن (زنّهم) على حد تعبير الكتير مننا وبقينا نبعته بإيدينا لأمهم البديلة اللى هى تيكنولوجيا الألعاب وأبوهم البديل اللى هو الكرتون.
أصلا الكرتون بتاع اليومين دول لوحده مصيبة وإن شاء الله لازم اتكلم عنه فى بوست تانى.
أى أم دلوقتى مبقتش مستحملة طفلها يقف جنبها فى المطبخ يتكلم معاها أو يناقشها أو حتى يطلب منها حاجة والصراحة يعنى الست الله يكون فى عونها هى يعنى هاتعمل إيه ولا إيه، هتطبخ ولا تشطف المواعين ولا تشوف الغسالة الفول اتوماتيك اللى مبتفصلش وعماله تاكل فى الشرابات وبس ولا ترد على ابنها ولا بنتها الزنانة دى. مش كفاية إنها مش ملاحقه ع الرسايل اللى نازله ترف عليها من الخماشر جروب اللى عندها عالوتساب (جروب المدرسة - جروب العائلة - جروب الشغل - جروب شلة النم على خلق الله - الجروب اللى اتعمل عشان نبارك لهايدي على خطوبتها وطبعاً الجروب اللى من غير هايدي عشان ننم على يوم الخطوبة واللى حصل فيها) يبقى بصراحة كدة أختر الإجابة الصحيحة مما بين القوسين
أيهما أهم وأولىُ (الوات ساب - الواد ابنك الزنان)؟

لو عايز تحلها ... الحل فى منتهى البساطة وقولته فى البوست اللى فات ممكن ترجعله
ولا قولك بلاش أنت اصلا مش عارف أو مش عايز ترجع لأبنك يبقى هترجع للبوست بتاعى

هاقولك هنا تانى وأمرى إلى الله وكفاية أنك اصلا انك صابر وبتقرالى لحد دلوقتى.
إسمع يا سيدي #الوصايا_العشر بعنوان (علشان خاطر ولادنا)

1- بصوا لازم تعرفوا ان الموضوع صعب فى أوله بس ولادكوا يستاهلوا تتعبوا عشانهم.

2- قبل ما تشد ولادك ناحيتك شد انت نفسك ناحية ولادك الأول، نادى عليهم وأقعد أتكلم معاهم فى أى حاجة، بس بشرط يكون التفزيون مقفول.

3- متستغربس لو لقيت نفسك بتهته ومش عارف تفتح معاهم اى موضوع وأنت اللى فى شغلك برنس ومدورها وتعرف تكلم عشرة فى وقت واحد (دا عشان متعودتش تتكلم معاهم وكل المواضيع اللى فى دماغك (+18)

قصدى (+35)

، فمش عايزك تتوتر خالص وهتحس بتحسن بالتدريج زى أى اتنين مخطوبين فى الأول بيفضلوا يبصوا لبعض والكلام بالقطارة وبعد كدة محدش بيعرف يسكتهم)

4- الموضوع صعب فى أوله بس ولادكوا يستاهلوا تتعبوا عشانهم.

5- متتعصبش لو لقيت ولادك مش مندمجين معاك فى الأول ودا غالباً لسبب من اتنين:
الأول لأنهم مش هايبقوا مصدقينك وهيشوفوا أدائك (فيك قوى) ساعتها متتكسفش من نفسك وأثبتلهم أنك صادق معاهم بضحكتك فى وشهم وبعدم استيائك لسماعهم لما يتكلموا.
السبب الثانى أنهم حتى لو صدقوا أدائك هتلاقيهم باصينلك ومزبهلين جداً وكأن فى فيلم جديد بيتعرض على وشك، إياااااك تقلق خالص، هما دلوقتى بيحاولوا يتأكدوا انك أنت أبوهم فعلاً.

6- الموضوع صعب فى أوله بس ولادكوا يستاهلوا تتعبوا عشانهم.

7- يا ست الكل لازم تعدلى الأريال بتاعك ناحية ولادك عشان صورتهم تظهر واضحة قدام عنيكي ( يعنى لما تلاقى الزن من الواتس وكمان من ولادك فى نفس الوقت) الطبيعي إنك ترمى الواتس عشان ولادك مش ترمى ولادك عشان الواتس. (ملحوظة: اللى فاتك ع الواتس بيتسجل وتقدرى ترجعى تقريه وتردى عليه واللى فات من ولادك صدقينى مابيرجعش)

8- وجود بنتك جنبك فى المطبخ فرصة عشان تعيش الجو ده من صغرها وتتعلم الطبخ بالتدريج بدل ما تذل جوزها فى أول الجواز وتحرق المطبخ مرتين على ما تتعلم زى ما حضرتك عملتى فى جوزك.

9- وجود أبنك جنبك فى المطبخ برضه ليه فايدة رائعة دلوقتى (شوفى الشيف الشربيني وابنه بياخدوا كام فى الحلقة).

10- زى ما قولت فى البوست اللى فات بـ 2 جنية ونص من على أول الشارع تقدروا تشتروا قصة أطفال تتحكى فى 10 دقايق للولاد قبل ما يناموا وهتحسوا الفرق فى عيونهم.

❤

11- #الحضن دواء لحاجات كتير قوى وحماية من مشاكل اكتر فى زمننا المهبب ده، وعشان هو دواء أحضنوا ولادكوا قوى 3 مرات فى اليوم (قبل المدرسة - أول ما يرجعوا م المدرسة - قبل النوم) وهتعرفوا ساعتها قد إيه إنتوا اللى كنتوا محتاجين الحضن ده أكتر منهم.
(ملحوظة: أحضنوا ولادكوا أحسن ما يدوبوا فى حضن تانى برة وأنتوا فاهمنى)

12- أخيراً لازم أأكد ← سواء لقيت الموضوع صعب ولا سهل فبرضه ولادكوا يستاهلوا تتعبوا عشانهم شوية.

فى النهاية تحية منى لكل واحد سخيف هايسيب كل اللى انا قولته ده ويقولى أنت قولت الوصايا العشر ودول 12 .. هقولك عارف والله يا فكيك عصرك وأوانك بس هى لازم تتقال كدة عشرة أو سبعة.